|
|
|
Anunci :: sense clasificar |
|
Xornada de reflexión e debate sobre a comunidade galega en Catalunya
|
|
per Grupo de reflexión
Correu-e: xornadagalcat@yahoo.es (no verificat!) |
19 abr 2005
|
Como galegos e galegas residentes en Catalunya, compartimos un conxunto de valores e principios comúns que non sempre foron explicitados e debatidos colectivamente. É por iso que é oportuno abrir un debate aberto sobre estes valores e, a partir deles, pensar na posibilidade de encetar un proxecto comunitario.
Con esta idea, estades convidados e convidadas a participar nunha xornada de discusión e posta en común que terá lugar o vindeiro 30 de abril, ás 16.30 h, no Museu Marítim de Barcelona (Entrada por Av. Drassanes). |
DOCUMENTO DE TRABALLO
Na última década temos asistido a toda unha serie de cambios na comunidade galega de Barcelona expresados na aparición dun amplo conxunto de colectivos. As dinámicas particulares contrastan coa falta de esforzos de converxencia, o que supón unha considerable mingua do seu potencial de proxección.
A base da presente iniciativa é propiciar un profundo debate en torno á realidade política, social e cultural da galeguidade de Catalunya, co obxectivo último de impulsar un proxecto colectivo que se converta en referente, a medio e longo prazo, dunha parte importante desa realidade.
Sondar a posibilidade de constituír unha nova organización social, cultural e política, que contribúa a dar resposta a moitas das novas necesidades e expectativas que demanda un conxunto cada vez máis amplo da comunidade galego-catalá; e que sexa capaz de visibilizarse e estruturarse coma un grupo de acción e creación dun novo espazo con presenza no ámbito galego de Barcelona.
Non se trata de substituír as propostas asociativas presentes na actualidade senón de aproveitar as oportunidades que podería ofrecer a conxunción do traballo autónomo deses grupos con aquel outro resultado de harmonizar as distintas forzas existentes. Tampouco de presentarse coma un proxecto alternativo de substitución, senón coma a expresión dunhas novas inquedanzas.
Trátase de promover a confluencia das diferentes sensibilidades e estratexias (que encarnan tanto grupos coma persoas) na construción dunha colectividade baseada nun conxunto de valores e principios ideolóxicos compartidos. De concentrar os esforzos na creación de sinerxías, como camiño para converterse nunha organización de referencia do mundo galego de Barcelona e de Catalunya.
Este bosquexo que agora presentamos foi elaborado co obxectivo de axilizar o debate e concrétase nunha proposta organizativa e ideolóxica, a máis dun exemplo de programa de iniciativas que se poderían levar a cabo durante o ano 2005. Será sometido a un amplo proceso de discusión pública, que concluirá coa convocatoria o vindeiro 30 de abril, no Museu Marítim de Barcelona, dunha xornada de reflexión e posta en común, onde se estudará a posibilidade de constituír unha nova organización.
I Proposta ideolóxica
O seguinte conxunto de valores e principios ideolóxicos teñen por obxectivo fundamentar o proxecto de colectividade proposto. Estes principios mínimos constituirían a base da construción dun referente sobre o cal articular as diferentes accións. Deles xurdirían os principais obxectivos e funcións da nova organización cultural, social e política.
-Aposta por unha cultura do espazo colectivo. Crear un espazo común, de acción e de creación colectivas, que permita a promoción da cidadanía consciente do valor do colectivo e do sentimento de comunidade.
-Compromiso coa democracia participativa. Con formas de organización política, asemblearias e horizontais, que sexan abertas e participativas e estimulen o traballo colectivo. Que dean protagonismo ó individuo e ó mesmo tempo faciliten a toma de decisións en grupo.
-Compromiso coa identidade galega. Coa súa reinterpretación en termos creativos e dinamizadores.
-Compromiso social e político. Organización colectiva galega comprometida coa análise crítica e construtiva da realidade, nun espazo de encontro libre e aberto para o debate e reflexión. Este compromiso levaría á participación activa no contexto social en distintos eidos e fomentando a transformación social e política dentro da propia comunidade.
-Compromiso coa integración colectiva en Catalunya. Coa potenciación de dinámicas de participación e interacción dentro do contexto sociocultural e político catalán.
-Aposta pola articulación de novos espazos de relación coa Galiza. Que posibiliten, entre outras cousas, artellar redes de comunicación e de acción en coordinación con grupos ou colectivos da Galiza.
II Obxectivos
-Articular espazos de acción, creación, análise e debate colectivo.
-Establecer redes de información, acción, distribución e intercambio.
-Facilitar recursos que contribúan a participación activa e o acceso libre e horizontal a información por parte dos membros da comunidade.
-Visibilizar o proxecto de colectividade nas súas esferas política, social e cultural.
-Visibilizar a identidade galega en termos de dinamicidade e creatividade, fomentando a cultura galega nas súas diferentes manifestacións.
-Participar activamente nos procesos sociais e políticos que teñan lugar en Catalunya.
-Crear espazos de diagnóstico e reflexión colectiva sobre a comunidade galega de Catalunya.
-Achegar as realidades sociais, políticas e culturais de Galiza e Catalunya respectivamente.
-Crear canles de relación con grupos e colectivos de Galiza e Catalunya.
-Converterse en punto de referencia para grupos e/ou individuos galegos que actúan nas mesmas coordenadas que nós ou non e para toda a nova emigración en termos utilitarios. |
Mira també:
http://geo.ya.com/xornadagalcat/
|
This work is in the public domain |
