|
|
|
Notícies :: pobles i cultures vs poder i estats |
|
Manifestacion de Besièrs deu 17 de març de 2007
|
|
per Anaram Au Patac
Correu-e: info ARROBA anaram.org (no verificat!) |
31 mar 2007
|
|
|
MANIFESTACION DE BESIERS DEU 17 DE MARC DE 2007
COMUNICAT - ANARAM AU PATAC
Aqueth 17 de Mars de 2007, mei de 20 000 personas que s’amassèn a Besièrs entà sostiéner la lenga occitana, entà reivindicar l’estacament a la cultura, la lenga, lo país. Sia mei deu doble de manifestants au par de l’aplec de Carcassona en 2005.
Occitans vienguts deus tres estats qui’ns dominan (italian, francés e espanhòu), qu’èran presents au parat d’aqueth rassemblament, hèra dinamic, hestiu, inter-generacionau e vertaderament popular.
Ua demonstracion de la hòrça collectiva cara a la dominacion !
Entà Anaram au Patac aquera escaduda shens precedent que constitueish entau movement occitan ua etapa suplementària e istorica tà çò qui ei de la defensa deus drets deus occitans e de las occitanas.
La reivindicacion culturau que toquè a Besièrs un nivèu qualitatiu e quantitatiu important tà l’aviéner deu movement.
« Sèm fòrça » ce-disèvan los manifestant-a-s. E ne podem pas denegar uei lo dia que lo movement occitan ei a vàder ua hòrça sociau.
D’ara enlà qu’ei clar que la lenga occitana n’ei pas sonque la preocupacion de quauques militants associatius e politics. La poblacion occitana qu’a prés consciéncia que cau shens que sauvar la lenga mes subretot que deu despassar ua logica de defensa e aquesir drets navèths entà tornar trobar la plaça sancèra dens la societat : dens la vita vitanta e publica, dens l’administracion, l’ensenhament, la cultura, los mèdias…
Lo movement que deu uei contunhar lo vam impulsat per aquera manifestacion e passar a ua etapa superiora en reivindicar clarament un estatut oficiau entà l’occitan. Que n’avèm uei los mejans e las condicions sociaus.
La reivindicacion « Occitan lenga oficiau », portada per Anaram au Patac desempuish la creacion en 1992, qu’èra hèra mei presenta dens la manifestacion que pendent la de Carcassona, muishant atau la maturitat tocada peu movement occitan en lo maine. Qu’aperam lo movement culturau a seguir aquera via e atau participar tà bastir lo camin de l’emancipacion.
La reivindicacion « Occitan lenga oficiau » qu’ei au còr d’ua campanha nacionau d’AAP orbida au començar de 2007. En mei deus visuaus (afichas, pegasolets, banderòlas…) e de las accions (seradas publicas a Pau, Bordèu, Cahòra, conferéncia de premsa…) aquera campanha qu’estó ahortida per un document presentant l’analisa d’AAP tà l’oficializacion de la lenga. Ua analisa qui’s premia sus proposicions precisas e concretas.
Aqueth tribalh, com l’accion d’AAP pendent aqueras quinze annadas passadas, que ns’a permés de superar un solh qualitatiu e quantitatiu au parat de la manifestacion de Besièrs. Atau, un plen bus qu’estó organizat per AAP Biarn e Hartèra, mantuas autòs per AAP Gasconha Nòrd e lo-a-s militant-a-s d’AAP Lengadòc qu’èran tanben mobilizats. Qu’ei fin finala un seguissi joen e dinamic de mei d’un centenat de personas qui trobavam darrèr la banderòla cò-signada per AAP e Hartèra « Sèm un pòple, Occitan lenga oficiala ».
Aquera banderòla que rebat la vision d’AAP : qu’èm un pòple, e en tant que tau, qu’avem drets legitimes de har arrespectar : l’oficializacion de l’occitan que n’ei un.
Mei que jamei Anaram Au Patac que’s peleja entà reivindicacions legitimas contra los Estats imperialistas qui’ns mespresan :
- Entà un estatut de lenga legitima atau com definit dens las proposicions nostas.
- Entà avançar shens esperar de cap tà la reconeishença deu dret a l’autò-determinacion, a l’unitat nacionau e politicò-territoriau d’Occitània.
- Entà la luta nacionau e la luta sociau qui non podem pas desseparar.
Entà Anaram au Patac, la manifestacion de Besièrs qu’estó tanben lo parat de popularizar lo tribalh internacionalista dab la quita desclaracion de Còrti, signada per mantuas organizacions politicas : còrsa, catalana, basca, bretona, alsaciana, guianesa, martiniquesa, polinesiana e occitana.
Dab aquera desclaracion de las nacions shens estat devath tutela francesa, que reivindicam lo respècte deus drets inalienables en tant que pòple : lo dret a l’autò-determinacion, lo dret de botar en òbra, dens l’encastre d’un estatut oficiau, lo desvolopament de las lengas e culturas nostas, lo dret de promòuver e mestrejar lo son desvolopament economic e sociau e lo dret de botar en òbra un processus de descolonizacion. Distribuida a milèrs d’exemplars la desclaracion qu’estó arcuelhuda favorablament peus-per las –militant-a-s.
La desclaracion de Còrti qu’estó illustrada dens lo seguissi d’AAP per la preséncia de las delegacions basca (Batasuna) e bretona (Emgann) darrèr la banderòla signada de l’apèu de Còrti « un estatut oficiau entà las lengas nostas ». Que’ns serviram d’aquera banderòla entà desfilar en Bretanha (a Lorient, lo 31 de mars) o au Bascoat entà la defensa deus drets linguistics.
D’autes internacionaus qu’èran tanben presents atau com delegacions catalanas (Maulets e Endavant), ua delegacion aragonesa e ua basca de la platafòrma d’accions entà la lenga basca Euskal Herriaren Euskaraz.
Aqueste 17 de Mars qu’estó lo parat entà AAP de balhar un present de planvienguda en Occitània a Felip Bidart, militant d’Iparretarrak recentament liurat après quasi 19 ans de preson. Felip Bidart que viu peu moment a Besièrs, puish que n’a pas lo dret d’anar tau Bascoat. Planvienguda en Occitània Felip !
AAP que vòu arremerciar totas las delegacions e l’enseme deus-de las militant-a-s e simpatisant-a-s. AAP que saluda tanben la preséncia deus companhons de la CNT 11, dejà presents en 2005 a Carcassona.
Ua escaduda de las bèras donc, e com ac disèvan lo-a-s manifestant-a-s « Sèm fòrça ».
L’escadença seguenta de la dinamica e de l’aviéner de nosaute-a-s, occitan-a-s, que serà en 2009. Que convienerà que d’aci Anem Òc ! e’s balha un servici d’encadrament de la manifestacion, a la mesura d’un eveniment qu’Anaram Au Patac desira de l’amplor mei grana.
Que perpausam au collectiu Anem Òc ! de participar a ua reflexion collectiva a aqueth subjècte e de contribuir a botar en plaça un sistèmi bon, eficaç e de pèrhem, entà har cara a las provocacions d’estrèma dreta.
Qu’èm un pòple en construccion, un pòple en movement qui sabó brembar aus tres governaments que ne’ns panarén pas jamei mei la dignitat.
AAP que publicarà dens lo numèro de la revista Har/Far qui vien ua analisa mei completa de la manifestacion de Besièrs e de las seguidas impensaderas.
Qu’èm ua hòrça !
Occitan Lenga Oficiau ! |
This work is in the public domain |
|
Re: Manifestacion de Besièrs deu 17 de març de 2007
|
|
per ostres |
31 mar 2007
|
|
que bé que s'enten des del català, l'occità |
|
Re: Manifestacion de Besièrs deu 17 de març de 2007
|
|
per i |
31 mar 2007
|
|
endavant els pobles, que es fotin els estats i les ments uniformes, salut |
|
Re: Manifestacion de Besièrs deu 17 de març de 2007
|
|
per Cambrilenc |
01 abr 2007
|
Ahir unes 5.000 persones en favor de la llengua bretona:
http://ouiaubreton.com/spip.php?article555 |
