|
|
|
Notícies :: pobles i cultures vs poder i estats |
|
Letra oberta a Pasqual Maragall
|
|
|
per Cambrilenc |
28 mai 2005
|
|
Aquesta és la carta oberta a Pasqual Maragall, enviada a la premsa catalana (que crec que no la va publicar) pel president de l´Institut d´Estudis Occitans en relació a l'adhesió de Catalunya a la Francofonia. |
Institut d’Estudis Occitans
Lo president
David Grosclaude
137 Ciutat Dufaur
64170 Artics
06 83 01 19 37
Letra dubèrta a Pasqual Maragall president de la Generalitat de Catalonha
Lo 21 d’abril de 2005
Sénher president
Anonciatz que França es favorabla a la reconeissença del catalan a Euròpa ! Anonciatz tanben que
Catalonha sera un dels sòcis de l’organizacion de la francofonia.
Imagini que nòstres amics catalans del Nòrd, que lutan per la subrevida de lor (vòstra ) lenga, se
regaudiràn d’aquelas informacions. A mens que la posicion de França siá pas tant clara coma o pensatz.
Coneissi l’article 2 de la constitucion francesa que daissam pas de combatre dempuèi 1992. Foguèt votat
al moment de l’adopcion del Tractat de Maastricht, amb lo sosten de la dreta e de l’esquèrra. « La langue de la
République est le Français ». Aquò ditz l’article 2 de la constitucion francesa ! E dempuèi las entravas a nòstre
trabalh, al dels bretons e tanben al trabalh dels catalans de França, se pòdon pas mai comptar. Èran
nombrosas abans ; se son multiplicadas.
Segur França fa de declaracions pel defòra, mas dedins se passa pas res. Enfin quand se passa quicòm
es per anar contra la subrevida de nòstras lengas ditas « regionalas ».
Sabètz, sénher president, que la recenta lei sus l’escòla adoptada en França elimina quasi l’occitan, lo
catalan, lo breton, lo basc ... de l’ensenhament ? Sabètz sénher president que l’occitan es l’unica lenga de
l’Union europèa parlada per mai d’un milion de personas que pòt pas aver dret a una television publica, e
quitament pas a una radio de servici public ?
Sabètz sénher president qu’avèm avut, nosautres tanben, fòrça promessas. Se vos acontentatz d’una
declaracion que vos ditz que França es pas contra l’oficializacion del catalan a Euròpa riscatz d’èstre fòrça
decebut.
E per çò qu’es de la granda organizacion de la francofonia avèm pas encara comprés quala es sa politca
en favor de la diversitat lingüistica. La vesèm pas !
Sénher president me sembla que i a un risc de veire d’unas minoritats d’Euròpa (es atal que veson los
catalans en França, e podètz èstre segur qu’aquò a pas cambiat ) tombar dins lo tracanard de declaracions
faitas per responsables franceses a destinacion del defòra. A dreta coma a esquèrra avèm en França de
politics per voler contunhar, e acabar, la politica lingüicida que denonciam dempuèi d’annadas. Pel moment
son majoritaris e lo govèrn los sotenguèt dins un debat recent a la cambra dels deputats en refusant de
modificar l’article 2 de la constitucion, e en refusant de ratificar la Carta europèa de las Lengas Regionalas e
Minoritàrias. Èra al mes de febrièr de 2005 ! Es aquò la politica lingüistica en França, quitament se se vestís
de la famosa « excepcion culturala » e se vòl èstre la campiona de la diversitat culturala. Mas aquò es pel
defòra. Pel dedins res càmbia pas !
Sénher president, serèi urós de vos rencontrar per vos parlar de tot aquò e per participar a refortir los
ligams qu’existisson entre Occitània e Catalonha. Pensi pas que poirà entravar los ligams que volètz afortir
entre la cultura francesa e la cultura catalana. Un darrièr punt per clavar : es una França de lenga catalana e
de lenga occitana que foguèt la « pòrta de la libertat » (segon vòstras paraulas) pendent fòrças annadas per
Catalonha ! E deman a aquela pòrta quina lenga parlarà ?
Soi a vòstra disposicion per ne parlar, a l’òra e lo jorn que vos convenga.
En vos pregar, sénher president, de creire a mas salutacions occitanas respectuosas.
David Grosclaude, president de l’Institut d’Estudis Occitans. |
This work is in the public domain |
|
Re: Letra oberta a Pasqual Maragall
|
|
per 33 |
28 mai 2005
|
|
AMUNT POBLE OCCITA!! |
